Peshko‘da ham koronavirusga qarshi emlash ishlari ketmoqda

Tumanda emlash ishlarini boshlash maqsadida 2021-yil 7-aprel kuni viloyat sanitariya-epidemiologik osoyishtalik markazidan 900 doza Covishield (Astra Zeneca), 500 doza ZF-UZ-VAC 2001 O‘zbekiston-Xitoy hamkorligida ishlab chiqarilgan vaksinalar maxsus avtotransportda olib kelindi. Vaksinalar bilan bir qatorda ushbu vaksinasiya jarayoni uchun zarur bo‘lgan barcha tibbiy vosita, dori-darmonlar Respublika byudjeti va xalqaro tashkilotlar homiyligida yetkazib berildi.

Maxsus himoya kiyim boshlar, kontaktsiz pirometrlar, antiseptik vositalar, spirt, paxta, tibbiy chiqindilar uchun maxsus idishlar, metodik qo‘llanmalar shular jumlasidandir.

Ushbu vaksinalar bilan birinchi navbatda tuman markazidagi Sog‘liqni saqlash vazirligining buyrug‘iga asosan, 65 yoshdan yuqori aholi hamda tibbiyot xodimlari ixtiyoriy ravishda emlanishi ko‘zda tutilgan.

Kecha, 8-aprel kuni tuman tibbiyot birlashmasining markaziy poliklinikasida Sanitariya epidemiologiya osoyishtalik va jamoat salomatligi bo‘limi hamda tibbiyot xodimlarining 10 nafari COVID-19 ga qarshi tibbiyot xodimlari nazorati ostida emlash o‘tkazildi. Emlash tadbirini o‘tkazish maqsadida tumanda 13 ta emlash punkti tashkil qilingan.