G‘ijduvonda 204 dona kuchli ta’sir qiluvchi dorini 1 600 dollarga sotishga uringan shaxs ushlandi

G‘ijduvon tumanida tarkibida gabapentin kuchli ta’sir qiluvchi moddasi bo‘lgan 204 dona «Gabaten» dori vositasini 1 600 AQSH dollariga sotishga uringan shaxs qo‘lga olindi. Tezkor tadbir Buxoro viloyati bojxona boshqarmasi tezkor tuzilmalari tomonidan o‘tkazildi. Bu haqda Buxoro viloyati bojxona boshqarmasi Buxoroisharif.uz internet nashriga ma’lum qildi.

Bojxona organlari huquqni muhofaza qiluvchi idoralar bilan hamkorlikda kuchli ta’sir qiluvchi dori vositalarining noqonuniy aylanmasiga qarshi amaliy chora-tadbirlarni davom ettirmoqda.

Shu yo‘nalishda Bojxona qo‘mitasining Kontrabandaga qarshi kurashish boshqarmasi xodimlari Davlat xavfsizlik xizmati bilan hamkorlikda Toshkent shahrining Yunusobod tumanida ham tezkor-qidiruv tadbiri o‘tkazdi.

47 yoshli fuqaroning xonadoni belgilangan tartibda ko‘zdan kechirilganda, yerto‘lada qonunga xilof ravishda saqlanayotgan 84 ta blisterdagi jami 1 176 dona «Regapen» dori vositasi aniqlandi va ashyoviy dalil sifatida olib qo‘yildi.

Bojxona qo‘mitasi Markaziy bojxona laboratoriyasi o‘tkazgan sud-kimyoviy ekspertiza xulosasiga ko‘ra, ushbu dori vositalari tarkibida jami 352,5 gramm pregabalin kuchli ta’sir qiluvchi moddasi mavjudligi tasdiqlandi. Bojxona organlari qayd etishicha, amaldagi tartiblarga muvofiq, mazkur moddaning 10 grammdan yuqori miqdori ko‘p miqdor hisoblanadi va javobgarlikka sabab bo‘ladi.

Hozir ushbu holatlar yuzasidan bojxona organlari tomonidan jinoyat ishlari qo‘zg‘atilib, tergov harakatlari olib borilmoqda.