Kanada AQSHga “dollarga dollar” tamoyili bo‘yicha javob bojlari joriy etadi

Kanada bosh vaziri Mark Karni AQSH bilan savdo muzokaralari natijasiz yakunlangach, Amerika bojlariga “dollarga dollar” tamoyili asosida javob berishini ma’lum qildi. Bu haqda Euronews xabar bermoqda.

Kanada tovarlarining qariyb 20 milliard dollarlik qismiga taalluqli yangi 50 foizlik AQSH bojlari shanba kuni kuchga kirdi. Karni Vashington so‘nggi daqiqada taklif etilgan shartlarga adolatsiz va iqtisodiy jihatdan nomaqbul o‘zgartirishlar kiritganini bildirdi.

Kanada hukumati javob choralari mamlakat ishchilari va korxonalarini himoya qilishga qaratilishini ta’kidladi. Karnining so‘zlariga ko‘ra, tomonlar so‘nggi haftalarda sezilarli siljishga erishgan bo‘lsa-da, kelishuv Kanadaning maqsadlariga javob bermagan.

AQSH savdo vakili Jeymison Grir esa Kanada hafta davomida kelishilgan savdo bitimini yakuniy tasdiqlashdan bosh tortganini aytdi. Uning ta’kidlashicha, Vashington Kanadadan yon berishlar evaziga po‘lat, alyuminiy, avtomobil va yog‘och mahsulotlariga bojlarni sezilarli kamaytirishni taklif qilgan.

Otava AQSHning po‘lat, alyuminiy va avtomobillarga qo‘ygan bojlarini yumshatish yoki bekor qilishga intilmoqda. Mutaxassislar Kanada javob bojlarini joriy etsa, savdo mojarosini yumshatish yanada qiyinlashishi mumkinligini qayd etmoqda.