Gʻijduvon tumanidagi fermer dalasida 9 oylik chaqaloq tashlab ketildi

Buxoro viloyatining Gʻijduvon tumanida daladagi shiyponda 9 oylik chaqaloq tashlab ketildi. Bu haqda viloyat Ichki ishlar boshqarmasi axborot xizmati xabar berdi.

Ma’lum bo‘lishicha, 22-iyul kuni soat 16:07 larda viloyat IIB ga tumanning “Ko‘lijabbor” MFY Ko‘xna Nayman qishlog‘idagi «Shukur To‘xta» fermer xo‘jaligining dala maydoni yoqasidagi shiyponda taxminan 9 oylik bola topib olingani haqida ma’lumot berilgan. Uning tuman tibbiyot birlashmasiga olib borilgani ham aytilgan.

Mazkur ma’lumot Gʻijduvon tumani IIB Navbatchilik qismida qayd etilib, tezkor tergov guruhi tomonidan hodisa sodir bo‘lgan joy ko‘zdan kechirilgan. Shu bilan birga, kechiktirib bo‘lmas tergovga qadar tekshiruv harakatlari olib borilgan.

Hozirda shaxsi aniq bo‘lmagan bola Gʻijduvon tuman tibbiyot birlashmasi bolalarni sog‘lomlashtirish bo‘limida shifokorlar nazoratiga olingan. Holat yuzasidan tuman Ichki ishlar boshqarmasi tomonidan tergovga qadar tekshiruv harakatlari amalga oshirilmoqda.