Buxorolik Malika Norqulova Markaziy va Shimoliy Osiyo chempioniga aylandi

Buxorolik yosh shaxmatchi Malika Norqulova Qirg‘izistonda bo‘lib o‘tgan 2026-yilgi Markaziy va Shimoliy Osiyo shaxmat chempionatida yuksak natija qayd etdi. U musobaqaning standart yo‘nalishida 12 yoshgacha bo‘lgan qizlar (G12) toifasida barcha raqiblarini ortda qoldirib, chempionlikni qo‘lga kiritdi.

Nufuzli musobaqada 9 tur yakunlariga ko‘ra Malika Norqulova 7,5 ochko jamg‘arib, o‘z yosh toifasida birinchi o‘rinni egalladi va oltin medal sohibasiga aylandi.

Chempionat nizomiga muvofiq, G12 toifasi g‘olibi sifatida u ayollar o‘rtasidagi FIDE ustasi (WFM) unvoniga sazovor bo‘ldi. Bundan tashqari, chempionga 500 AQSH dollari miqdoridagi bosh mukofot ham topshirildi.

Malika Norqulova ushbu musobaqadagi muvaffaqiyatli ishtiroki orqali xalqaro reytingini ham sezilarli yaxshiladi. Natijada uning FIDE reytingi 25,6 punktga oshdi.

Bu natija nafaqat Malika Norqulova, balki Buxoro shaxmat maktabi uchun ham muhim yutuq bo‘ldi. Yosh sportchining xalqaro arenadagi muvaffaqiyati mamlakatimizda shaxmat sportiga qaratilayotgan e’tibor o‘z samarasini berayotganini yana bir bor namoyon etdi. Bunday g‘alabalar yosh iste’dodlarni yangi marralar sari ruhlantirib, ularning xalqaro musobaqalarda yanada katta natijalarga erishishiga zamin yaratadi. Shaxmat nafaqat sport turi, balki mantiqiy fikrlash, sabr-toqat va strategik tafakkurni rivojlantiruvchi muhim intellektual yo‘nalishlardan biri hisoblanadi. Malika Norqulovaning ushbu muvaffaqiyati kelgusida yanada yirik xalqaro musobaqalarda ham yurtimiz sharafini munosib himoya qilishiga bo‘lgan ishonchni yanada mustahkamlaydi.