Romitanda bolalar reanimatsiyasi bo‘limining yangi qismi ishga tushirildi

Romitan tuman tibbiyot birlashmasida bolalar reanimatsiyasi bo‘limining zamonaviy tibbiy jihozlar bilan ta’minlangan yangi qismi foydalanishga topshirildi. Yangi sharoitlar og‘ir ahvoldagi bolalarga shoshilinch va sifatli tibbiy yordam ko‘rsatish imkoniyatlarini kengaytirdi. Bu haqda Buxoro viloyati Sog‘liqni saqlash boshqarmasi Buxoroisharif.uz internet nashriga ma’lum qildi.

Yangi qismning ochilishida Buxoro viloyati Sog‘liqni saqlash boshqarmasi boshlig‘i Muxsin Rajabov, Romitan tumani hokimi Umed Barnoev, tuman prokurori Farrux Atoev, tibbiyot xodimlari va jamoatchilik vakillari qatnashdi.

Avval bolalar reanimatsiyasi tibbiyot birlashmasining chekka binosi ikkinchi qavatida, shoshilinch tibbiy yordam bo‘limidan ancha uzoqda joylashgan edi. Bu holat og‘ir bemorlarni tezkor qabul qilish, diagnostikadan o‘tkazish va zarur tibbiy yordam ko‘rsatishda noqulaylik tug‘dirgan.

Ayniqsa, yozning issiq va yog‘ingarchilikli kunlarida bu qiyinchiliklar yanada sezilarli bo‘lgan. Endilikda bolalar reanimatsiyasi shoshilinch tibbiy yordam bo‘limiga yaqin, kattalar reanimatsiyasiga tutash hududdagi zamonaviy sharoitlarga moslashtirilgan qismda faoliyat yuritadi.

Yangi joylashuv og‘ir ahvoldagi bemorlarni tezkor qabul qilish, zarur diagnostikani o‘tkazish va samarali davolash choralarini o‘z vaqtida amalga oshirish uchun qo‘shimcha imkoniyat yaratdi.

Bo‘lim 6 o‘ringa mo‘ljallangan. Unda 6 nafar reanimatolog-vrach, 22 nafar hamshira va 15 nafar kichik tibbiy xodim faoliyat yuritmoqda.

2026-yil boshidan buyon bolalar reanimatsiyasi bo‘limida 320 nafardan ortiq bemor davolangan.

Yaratilgan yangi sharoitlar bolalarga shoshilinch tibbiy yordam ko‘rsatish sifatini oshirish, og‘ir bemorlarni davolash samaradorligini ta’minlash va tibbiyot xodimlari uchun qulay mehnat muhitini shakllantirishga xizmat qiladi.