Buxoroda intim xizmatlar ko‘rsatuvchi qizlar anketalarini Telegram-kanalga joylab, ular orqali pul ishlab kelgan shaxs ushlandi (video)

Bugungi kunda axborot texnologiyalari rivojlanishi nafaqat qulaylik, balki ayrim kimsalar uchun g‘arazli maqsadlarda foydalanish quroliga ham aylanmoqda. Buxoro viloyatida xotin-qizlarning sha’ni va qadr-qimmatini oyoqosti qilib, ijtimoiy tarmoqlar orqali qo‘shmachilik bilan shug‘ullanib kelgan shaxs ushlandi.

Virtual olamdagi “xizmatlar”

O‘zbekiston Respublikasi Ichki ishlar organlari tomonidan jamiyat axloqiy qadriyatlarini asrash va odam savdosiga qarshi kurashish doirasida o‘tkazilgan navbatdagi tezkor tadbirda kutilmagan holat aniqlandi. Buxoro viloyati Ichki ishlar boshqarmasi xodimlari 21 yoshli fuqaroning qilmishlariga chek qo‘yishdi.

Buxoroisharif.uz qo‘lga kiritgan ma’lumotlarga ko‘ra, ushbu yigit Telegram messenjerida maxsus kanal tashkil etib, u yerda ayollarning suratlarini joylashtirgan. U mijozlarga “soatbay” va “tunbay” xizmatlarni taklif qilib, har bir “uchrashuv” uchun aniq narxlarni belgilab kelgan.

100 ming so‘m uchun jinoiy javobgarlik

Joriy yilning 12-fevral kuni soat 15:00 larda mazkur onlayn “fohishaxona” egasi navbatdagi kelishuvni amalga oshirayotganida qo‘lga olindi. U Buxoro shahridagi xonadonlarning birida mijozga jinsiy aloqa uchun ayol kishini 400 000 so‘m evaziga topib bergan.

Ushbu noqonuniy xizmati evaziga o‘zi uchun 100 000 so‘m miqdoridagi “ulush”ni olayotgan vaqtida ashyoviy dalillar bilan ushlandi.

Qonun ustuvorligi va jazo muqarrarligi

Hozirda mazkur holat yuzasidan ushbu shaxsga nisbatan O‘zbekiston Respublikasi Jinoyat kodeksining 131-moddasi, 1-qismi (Qo‘shmachilik qilish yoki fohishaxona saqlash) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.

Eslatib o‘tamiz: Jamiyatda axloqsizlikni targ‘ib qiluvchi va qo‘shmachilik bilan shug‘ullanuvchi har qanday shaxsga nisbatan qonuniy choralar ko‘rilishi qat’iy ta’minlanadi.